Burma (Myanmar) rama kan Mizo unaute khawsakna Chin Hills-ah chuan tuna Mizoram mipuiin kan tawrh mek Mau tam tam pui chu an tuar ve mek a, a bik takin Burma ram Mizoram leh Manipur hnaihah te chuan tam nasa takin a tla mek a ni. Heng tam tuar mekte tanpui nan hian Chin Human Rights Organisation, khawvel hmun hrang hranga khawsa mekte’n hmalain, sum lakkhawmna pakhatah Concert hi a buatsaih ta a ni.

Khawvela khawpui tam tak zingah nitin khawsak nana khawpui hautak ber (most expensive city ) an tih thar chu London khawpui khu a ni. Nikhat khawsak nan ringawt pawh India ram pawisa a chhut chuan a hniam ber pawl-ah Rs 3000/- bawr vel a ni lawih mai ! He khawpui khawsak hautak takah hian Mizo tlangval-in dawr a nei ve a sin ! Mak i ti em ? A bul tanna a i hriat chianphei chuan thil mak (miracle) a tling a ni. A chanchin leh nihna te Lelte -ah a khat tawkin kan thai lang fo tawha, Lelte leh Mizo zaithiamte pawh a zarzotu kan ni a, nitla senglo ram neitu ni thin khawpui ber LONDON-a khawsa Jimmy Lalrokima Pachuau hian mite hriatah a chanchin tarlan hi a duh ngai lova, ziakmi tam takin a chanchin an dil pawhin an thlawhtling ngai lo.Mahse tun tum Lelte Silver Jubilee hmang tura London atanga a lo zin vang vang hian ama phalnain a chanchin kan hriat angte ‘Lelte-ah kar tanglang dawn e aw’ kan han tih chuan, ban deuh takin ‘ ziak mai u la ‘ tiin min chhanga, a tum loh ramah kan khalh lut a nih pawhin amah Pu Jimmy hian min ngaidam mai rawh se. A chanchin hre chak hi Mizo thalaite zingah an tam em a ni, a nih ang ni ve chak, a hlawhtlin anga hlawhtling ve chak hi kan lo ther fur tawh a, chungte tan hlei hlei chuan tun tum kan Lelte chhuak a ‘Mi Hlawhtlingte’ chanchin kan ziak hi a tangkai ngei ang.